سماح أنور: «دخلت مجال التمثيل بالصدفة وأنا عندي 15 سنة» (فيديو)

حلت الفنانة سماح أنور، ضيفةً على بودكاست «فضفضت أوي»، تقديم المخرج معتز التوني، والمعروض على منصة «watch it»، غذ حمل اللقاء مواقف كوميدية وحكايات طريفة عن حياة الفنانة.

وقالت سماح أنور خلال الحلقة: «أنا دخلت كلية الآداب قسم فرنساوي حضرت لحد سنة 3 لأني من أولى جامعة كنت بشتغل ابتديت شغل في ثانوية عامة، أول حاجة خالص كان في مسرح التليفزيون وكانوا بيعملوا مسرحيات للتليفزيون أبويا كان بيألف وينتج المسرحيات دي».

وتابعت: «أبويا كان بيعمل رواية وكانت روايات التليفزيون دي بتتعمل بروفات وبعدين يصوروا، بعد ما عملوا البروفات النهائية البطلة كان عندها تصوير في استديو مصر ووقعت ورجلها اتكسرت وبلغوا أبويا أن مفيش تصوير عشان مش هينفع تمثل، كان الله يرحمه أستاذ عبدالمنعم مدبولي المخرج وبطل في المسرحية مع أستاذ وحيد سيف، أستاذ عبدالنعم مدبولي وأستاذ وحيد سيف زعلوا أوي لأن الكاميرات في المسرح وخلاص كانوا هيصوروا».

وأضافت :«وكان فلوس التصوير هتتقبض تاني يوم، أنا كنت أيامها كان أتوبيس المدرسة بينزلني عند المسرح عشان كان والدي وولدتي بيشتغلوا لحد بالليل فكنت بروح أحضر البروفات، وكنت حافظة الرواية لأني بروح كتير وكنت بتفرج بتركيز مش عشان بنت المنتج، أستاذ عبدالمنعم مدبولي قال لبابا طيب ما سماح حافظة الدور».

واختتمت: «كان عندي 15 سنة وكنت قاعدة في الأوضة مستنياهم وبحلم أنهم هيندهولي وبعمل الرواية والناس بتسقف لي، ولقيت ماما داخلة عليا وبتقولي بابا عايزك، طلعت ليهم سألني أستاذ عبدالمنعم مدبولي أنتي حافظة الرواية كان فيها مونولوجات كتير لأنه كان كاتبها لفؤاد المهندس وشويكار ومتعملتش عشان اتطلقوا، قلتلهم أني حافظة وفعلا قلت فاقتعنوا بيا وكنا بننقذ الموضوع مفيش حاجة في دماغهم غير كده، أنا مكنتش عظيمة طبعا بس هما حسوا أن في حاجة فيا مش مجرد بنت المنتج».

برنامج «فضفضت أوى» أحدث إنتاجات Watch it الأصلية، مكون من 30 حلقة ويذاع كل يوم أربعاء عبر منصة Watch it الرقمية، يحل خلالها 30 فنانًا ضيوفًا على المخرج معتز التوني لسرد مواقف مضحكة وكوميدية، وهم: كريم محمود عبدالعزيز، والفنانة منة شلبي، والفنان محمد رضوان، والفنان محمد ثروت، والفنان هشام ماجد، والفنان عمرو يوسف، والفنان ماجد الكدواني، والفنان بيومي فؤاد، والدكتور أشرف زكي نقيب المهن التمثيلية، والفنان محمد القس، رحمة أحمد، سامي مغاوري، محمد ممدوح، أوس أوس، ميمي جمال، ميرنا جميل، أيمن وتار، أحمد فتحي، هالة فاخر، عبدالرحمن «توتا»، علاء مرسي، مصطفى أبوسريع، محمد أوتاكا، والبرنامج للمنتجين أحمد الجنانيني وهشام جمال.

اقرأ ايضًا:

سماح أنور: وافقت على «كتالوج» دون تردد (حوار)